You are currently viewing Fresh Grad 無實力? 入嚟睇 4 大熱門進修課程推薦,有CEF資助!

Fresh Grad 無實力? 入嚟睇 4 大熱門進修課程推薦,有CEF資助!

大學求其讀咗個水泡科目,畢咗業發覺自己未必真係鍾意做返讀嗰科專業?想趁後生試多啲唔同嘅方向,發掘自己嘅潛質?即刻睇吓以下四大熱門進修課程推薦,全部都有政府持續進修基金資助,符合資格可免費學多樣嘢,增值自己!

1.整餅

根據非正式統計,有兩成年輕人嘅夢想係開一間Cafe,而且越來越多後生鍾意約去Cafe度坐下傾偈拍下拖。學識整餅之後除咗可以開Cafe仲可以開網店!宜家唔少網店嘅蛋糕都賣到營業額好過大牌子嘅蛋糕,仲唔使比鋪租添!如果你都有咁嘅想法,不妨考慮吓讀個整餅嘅證書課程。

  • 課程名稱:西式烘焙及糕餅製作證書
  • 學費:12,620元
  • 學制:兼讀制
  • 修業期:2.5個月(面授時數32小時及畢業考試2小時)
  • 資歷架構級別:2
  • CEF課程編號:43C130000

了解更多:https://www.wfsfaa.gov.hk/cef/tc/preparation/course_search_detail.php?i=43C130000&course_name=%E7%B3%95&P=1

2.化妝

宜家香港越來越多靚女KOL,就算行喺條街都覺好似多咗好多靚女咁,其實全部都係靠化妝!化妝就大家都識,求其擦個粉底畫個眉就叫化妝?原來化妝都有好多學問,學識專業化妝,令你嘅妝容與別不同!呢個就係普通人同KOL嘅分別!鍾意靚嘅朋友不妨考慮依個證書課程。

  • 課程名稱:化妝品學基礎證書
  • 學費:8,600元
  • 學制:兼讀制
  • 修業期:5個月(面授時數32小時及畢業考試2小時)
  • 資歷架構級別:2
  • CEF課程編號:43C104034

了解更多:https://www.wfsfaa.gov.hk/cef/tc/preparation/course_search_detail.php?i=43C104034&P=448

3.作曲

個個都話香港樂壇已死,但係近期嘅全民造星、叱咤頒獎禮又令香港樂壇死灰復燃!如果你有一份對音樂嘅熱誠同天份,但又唔想做幕前,做作曲填詞都係一個唔錯嘅出路!鍾意音樂嘅你可以考慮吓呢個流行音樂創作課程,不過唯獨要注意嘅係,依個課程未有資歷架構級別,而且費用比較昂貴,適合任性又鍾意追夢嘅年輕人!

  • 課程名稱:MIDI 與數碼錄音技術課程及流行音樂作曲課程(一)
  • 學費:27,730元
  • 學制:兼讀制
  • 修業期: 47小時 
  • 資歷架構級別:N/A
  • CEF課程編號:28Z065377

了解更多:https://www.wfsfaa.gov.hk/cef/tc/preparation/course_search_detail.php?i=28Z065377&area=28&P=1

4. 整網站

喺依個資訊科技發達嘅年代,個個都機不離手,無論去邊、食咩都要上網搵,有咩頭暈身㷫又係上網搵,甚至連另一半都係上網搵。所有大小公司都係依靠網站去令到大眾認識自己,所以學識整網站依個專業技能,任何公司都需要你!而且唔少年輕人都希望以低成本創業,整網頁可謂必備技能!呢個資訊及通訊科技業之課程令你三個月之內可以掌握整網頁嘅大小技巧,而且學費額係CEF之內,課程仲有資歷架構是級別3,可以用盡資助之餘,讀完唔會浪費時間,出嚟絕對搵到工,將來亦一定會用得着,絕對係快靚正之選!

  • 課程名稱:資訊及通訊科技業之課程
  • 學費:12,800元
  • 學制:兼讀制
  • 修業期:3個月(36小時)
  • 教學語言: 粵語
  • 資歷架構級別:3
  • CEF課程編號:78C133904

了解更多:點止學嘢網頁製作證書課程

Leave a Reply